أهلاً بكم جميعاً
السنة الماضية تقريبا بنفس هذي الفترة، وصلتني رسالة من الملحقية الثقافية مفادها أن فيه فرصة تدريب في شركة فايزر بفروعها بأمريكا وكان هالشي بسبب افتتاحهم لفرعهم الجديد بالسعودية. طبعاً يوم شفت الرسالة ما كنت متحمسة كثير. هذيك الفترة ما كان عندي اهتمام بالصناعات الدوائية كنت أفضل الكلينكال. لكن زوجي نصحني أني أجرب أنا مو خسرانة شي. ويعني مو لما أقدم بيقبلوني على طول على قولته “قدمي وشوفي قيمتك بالسوق وبعدين إذا قبلوك، هنا تقدرين ترفضين أو تقبلين” طبعاً هذي النصيحة كانت ذهبية بالنسة لي علمتني أني أجرب أشياء جديدة أنا مافكرت فيها وفتحت لي أبواب
طبعاً قدمت من هذا الموقع  وحاولت أختار الأقسام اللي تناسب تخصص الصيدلة أو الي تهمني وكان فيه فروع كثيرة للشركة حوالين أمريكا. حاولت أختار الأماكن القريبة حولي يعني مو أبعد من 7 ساعات سواقة بالسيارة. سميت بسم الله وسلمت الابليكشن. بعد شهر تقريباً أرسلوا لي ايميل من فرعهم في متشغن أن يبغوا يسوا مقابلة معاي بالتليفون وعطوني أوقات معينة
سويت المقابلة وكانوا 3 رجال اللي يسألون وطبعا الله لايوريكم التوتر والتخبيص مع أنها كانت بالتليفون وخلاص غسلت يدي بسبب الخرابيط اللي قلتها. المهم بعد 3 أيام أتصلوا علي تليفون وقالوا لي مبروك أنقبلتي
المشكلة اللي واجهتها كانت أن المكان اللي بتدرب فيه يبعد 5 ساعات عن ولايتنا وأن الشركة مايوفرون سكن. اضطريت أني أروح هناك وأدور لي مكان أسكن فيه لمدة 10 أسابيع. طبعاً كان السكن يآخذ من راتبي كثير لكن الشركة كانت تدفع لي راتب فكنت أستخدمه لمصاريفي وكنت راضية أستخدم كل الراتب على المصاريف هناك لأن التجربة كانت تسوا
أول ماوصلت هناك بتاريخ 5/6/2017 سووا لنا حنا المتدربين لقاء ترحيبي وعرفونا على الشركة وشنو يصنعون بالفرع هذا. مصنعهم بمتشغن كان من أكبر الفروع بأمريكا ينتج أكثر من 150 دواء وأغلبيتهم أدوية تُحقن بالجسم  فكانت القوانين عندهم صارمة وكانت هيئة الدواء والغذاء تجي عنذهم كثير تشيك المصنع. هذا الفرع يُصدر لدول أخرى مثل اليابان وكوريا والسعودية أيضاً
كل الطلاب اللي معاي بالتدريب تخصصاتهم يا هندسة أو كيمياء وكنت أنا الوحيدة اللي كان تخصصي صيدلة. وكان لكل طالب متدرب مرشد بالشركة يساعده بشغله وبأي شي. المرشد حقي كان أفضل مرشد بالحياة بالنسبة لي. طيب جداً جداً ويساعدني بأي شي أحتاجه حتى لو كان خارج الشغل . كان يدعمني ويحفزني أنجز أكثر. أول يوم وصلت فيه أعطاني جوال الشركة والكمبيوتر وضبط لي مكتب أشتغل فيه بعد. وبعد يومين حطوا لي لوحة مكتوب عليها أسمي برا المكتب. باختصار كانوا يهتمون فينا وحسيت بالانتماء للمكان
أول ماعرفوني على البروجكت حقي، كان أغلبيته يتمركز على دخولي لغرف التصنيع، لكن واجهتني مشكلة. بما أن هم يصنعون أدوية تحقن بالجسم، فلازم يكون كل شي معقم ولازم كل الموظفين يلبسون ملابس خاصة من شعرهم لين رجولهم. المشكلة كانت أني أتحجب وهم ما كان عندهم الا الأغطية الشعر العادية وماعندهم شي للحجاب. وما كان يمديهم يطلبون لي لبس خاص. فاضطروا يغيرون مشروعي لشي خارج غرف التصنيع. بالبداية زعلت كثير يوم دريت لأن البروجكت الثاني اللي عطوني اياه كان عن الأجهزة الطبية وممل. كان أغلبيته شغل مكتبي لكني قلت الحمدلله خيرة
من خلال تجربتي تعرفت فيها على ناس كثير من جميع التخصصات. والتقيت بالصيدليين اللي يشتغلون بالشركة وكانوا 2 فقط وهم مسؤوليين كبار ومتواضعيين جداً. كانت العلاقات اللي عملتها خلال هالتجربة لاتعوض بثمن. ومرة قابلت شخص كان يساعد بفرع الشركة بالسعودية وقال لي اذا ودك تزورين المصنع متى ما رجعتي السعودية، أنا بكلم لك أحد يسوي لك جولة حول المصنع. هذي الفرصة ماكنت بتصير لي ولا في الأحلام لو أني ما حصلت فرصة التدريبز اللي تعلمته أن الفرص ما تحصل لك إلا لما تكون عندك تجارب. ماتجي لك وأنت قاعد بالبيت
شنو تعلمت من خلال التجربة؟ 1. بناء العلاقات هي اللي بتنفعك كطالب حتفيدك بمجال دراستك أو مجال الوظيفة وبتتعلم مهارات تفيدك خلال مرحلة عملك. 2. أنت كطالب أستغل إجازة الصيف بالتدريب ولاتستههين أبداً بهالفرص لأنها ممكن تكون بوابة لوظيفتك المستقبلية 3. فرصة التدريب تعطيك فرصة بالتعرف على مختلف الوظائف المتاحة للتخصصك والتجربة بتعلمك اذا أنت حبيت مجال العمل أو لا. فلما تتخرج تكون عندك فكرة عن وين تبي تقدم وشنو تبي تشتغل
بالنهاية أحب أنصح كل الطلاب أنهم يخوضوا تجربة التدريب حتى لو كان شي بسيط جداً لأنهم بيتعلموا حاجة تنفعهم أفضل من قعدتهم بالبيت. وغير المهارات اللي بيكتسبونها، بيبنون علاقات مهنية حتنفعهم بالمستقبل
كان ودي أضيف صور لتجربتي بالشركة لكن للأسف التصوير كان ممنوع تماماً بأي مكان بالشركة. اذا كان عندكم أي سؤال بخصوص تجربتي التدريبية، تواصلوا معي عبر حساباتي بالسوشال  ميديا
  

Leave a Reply

Your email address will not be published. Required fields are marked *