أهلا بأصدقاء مدونتنا
بما أن بداية 2018 صارت تغييرات كثيرة بالأوضاع الإقتصادية، أعتقد هذا هو الوقت المناسب لنتعلم كيفية التوفير والإدخار بطرق بسيطة مثل التقليل من شراء الكماليات اللي ما نحتاجها. قبل فترة طويلة كتبت موضوع عن التوفير تقدرون تطلعون عليه هنا أولاً
أولاً وقبل كل شي لازم تجلس وتشوف وين راتبك أو مكافأتك تنصرف
مهم جداً تمسك ورقه وقلم وتكتب كم مصروفك الشهري وتسجل كل شي بالأرقام حتى لو تبدأ بأرقام تقريبية عشان تعرف وين تصرفك فلوسك فيه. هل أغلبية مصروفك يروح على الضروريات ولا تصرف كثير على الكماليات. بعدها تحدد هل الكماليات هذي كانت ضروريه أو لا؟ هل المصاريف على هذي الكماليات كانت بهذا الشهر فقط أو راح تتكرر بالشهور الأخرى (تشتريها بشكل دائم)؟
 من أكثر الأشياء اللي دائماً الناس تصرف عليها هي مقاضي البيت من السوبر ماركت. بالنسبة لنا عشان نحد من هذي المصاريف حددنا عدد المرات اللي نروح فيها لـ السوبرماركت. نتسوق مرتين فقط بالشهر وهالشي يقلل من مشترياتنا. كل ما كثرت روحاتكم للسوبرماركت، كل ما كثرت مشترياتكم وتكثر المشتريات اللي مالها داعي واللي ما تحتاجونها. وأيضاً كتابة قائمة بالاشياء اللي تحتاجونها قبل ماتروحون تساعد كثير بالحد من الأشياء اللي ما تحتاجونها اذا التزمتوا بالقائمة. الاغراض اللي تكتبونها بالقائمه تحدد لكم الأقسام اللي تحتاجون تروحونها فقط. لما ماتكتبون احتياجاتكم، تضطرون تروحون كل الأقسام عشان تتذكرون ايش تحتاجون + تشترون أشياء ماتحتاجونها
أطبخوا بالبيت. الأكل بالبيت أوفر والذ وأصح. مهما كنتوا تفكرون أن الخضار والفواكه غاليه، إذاحسبتوها صح  وقارنتوها مابتكون أغلى من الاكل برا البيت. الوجبات الخفيفه من الشبسات والشوكلاتات والمشروبات الغازيه تعتبر مكلفه حالياً فحاولوا تبتعدوا عنها أو اشتروها مرتين أو ٣ بالشهر باختصار حاولوا تقللون منها قدر الامكان. مثلاً حنا ما ناكل كثير من برا ولا نشتري وجبات سريعة. يعني مره الى مرتين بالشهر بالكثير إذا ماكان لنا خلق نطبخ شي أو ترفيهاً عن النفس. هو الموضوع ممكن يكون صعب بالبدايه للي متعودين يآكلون من برا دايم. لكن أنصحكم انكم تحسبون مصاريف أكلكم لمدة شهر. وقتها ممكن تقتنعون قد ايش هذي المصاريف تأثر على راتبكم وبعدها تقتنعون بالتقليل من مصاريفكم وأن هالفلوس ممكن تدخرونهم لشيء أفضل
أعملوا قهوتكم بنفسكم. القهوه من الاشياء اللي نصرف عليها كثيراً أيضاً بدون مانحس. حلو وسهل أنك تشتري قهوه على الطريق للدوام، لكن القهوه الخارجيه تكلفنا كثير بدون مانحس. مثلاً أنا كمبتعثه كوب القهوه يكلفني من ٤ ونص الى ٥ دولار. وراح أشتريها ٥ أيام بالاسبوع.  فالقهوه راح تكلفني ٢٥ دولار بالاسبوع و١٠٠ دولار بالشهر وهذا يعني ١٢٠٠دولار بالسنه بما مقدار ٤٥٠٠ ريال.  بينما أقدر أحط ربع هذا  المبلغ بآلة قهوه وملحقاتها وكوب يحفظ الحرارة للدوام. وأكون وفرت أكثر من ثلثين الى ثلاثة أرباع المبلغ
 تسوقوا واشتروا اللي تحتاجونه فقط. لاتشترون ملابس بس عشان عجبتكم القطعة. الكثير يروح الأسواق عشان يتمشى لكن كل ماعجبهم شي وحبوه يشترونه على أساس ما يخلون شي بخاطرهم حتى لو ما كانوا يحتاجون هالقطعة أساساً. حلو أننا نروح نتمشى ونتفرج على الملابس والموديلات الجديدة ونشوف أشياء تعجبنا ونحبها لكن ليه مانعبر عن إعجابنا عنه ونرجعه! ليه لازم ناخذه معنا! متأكده أن مافي دولاب يخلوا من قطعة ملابس شريناها ومالبسناها أو لبسناها مره أو مرتين. مافي شي يمنعنا أننا نشتري شي يعجبنا بالعكس لكن مو كل شي يعجبنا نشتريه. من الأشياء اللي سويتها عشان أتخلص من هالعاده هي التسوق اون لاين. أتسوق وأحط كل اللي يعجبني بالسله وأرجع بعد يومين او أسبوع وأشوف وش حطيت وغالباً أحذف كل شي لأن رأيي تغير وماصرت أشوفهم جذابين أو أكتشفت أني ما أحتاجهم. حتى صرت أطبق هالشي على أرض الواقع إذا رحت أتسوق وعجبني شي ما أشتريه على طول لا أول أرجع البيت “وأنام عليه” بمعنى أني أفكر فيه هل أحتاجه جد؟ وين بلبسه؟ هل بحلل قيمته؟ وبعدها يا أرجع أشتريه أو خلاص أنساه. ومرات عادي أروح أشتري شي لأني حلمت فيه. هذا دليل أني جد حبيته وخلاص أبيه. لذلك لاتشترون شي بدون ماتنامون عليه وتعرفون إذا تحتاجونه أو لا
الكهرباء: مع ارتفاع الأسعار الارشاد فيها صار ضروري. طبعاً مانقدر نسوي الكثير لكن نقدر نوفر القليل. من الأشياء اللي جربتها وفرقت معنا كثير بفاتورة الكهرباء هي الأفياش. الأفياش اللي ماتستخدمونها افصلوها. لأنها حتى وهي مشبوكه تصرف كهرباء. فالافياش اللي ماتستخدمونها بالتو واللحظه أفصلوها. ثاني شي الانوار، اللي ماتحتاجونها طفوها. مثل مداخل البيت لما مايكون حد برا البيت طفوه. وأنوار الغرف الفاضيه
تغسيل الملابس. حاولوا تغسلونها بأوقات الصباح او الليل. هذي معلومه اكتشفتها قبل فتره أن بالويكند وبعض أوقات اليوم يزيد فيها سعر واط الكهرباء. مثلاً بالمدينه اللي أنا ساكنه فيها. أيام الأسبوع من الساعه ١٢ مساءاً الى الساعه ٥ مساءاً ويوم الاحد يزيد سعر حساب الواط بهالوقات فأتجنب الغسيل فيها. من هذي الخطوات البسيطه فاتورة الكهرباء فرقت معي بحول ٢٠ الى ٣٠ دولار وهذا الشي يفرق على مدى سنه وأكثر. لذلك  لاتستهينوا بهالخطوات البسيطه
طبعا كثير يقول ليش نوفر ونجمع فلوس اذا مابنستخدمهم في شي. الفلوس اللي توفرونها ممكن تسافرون وتستخدمونها لتجارب جديده  تصنع لكم ذكريات جميله بدل ماتضيعونها على ملابس أو أكل وأشياء استهلاكيه اخرى

Leave a Reply

Your email address will not be published. Required fields are marked *