مرحبا يااصدقاء,
راح نعرفكم اليوم على الجامعه اللي ندرسها فيها “جامعة ايوا\ the university of iowa”

معلومات عامه:

جامعة ايوا هي جامعه قديمه جدا, تم تأسيسها ب ٢٥ فبراير عام ١٨٤٧ وذلك يعني ان اليوم ذكرى تأسيسها ١٧٠

مقرها ايوا سيتي في ولاية ايوا
وتضم احدى ١١ كلية جامعيه وهي
  • كلية الفنون والعلوم الحرة
  • كلية تيبي للاعمال
  • كلية الهندسه
  • كلية الصيدله
  • كلية التربيه
  • كلية التمريض
  • كلية الدراسات العليا
  • كلية القانون
  • كلية كارفر للطب
  • كلية طب الاسنان
  • كلية صحة المجتمع
  • الكلية الجامعيه

لونها الذهبي والأسود

 ورمزها Hawk
يتم قبول اكثر من  30 الف طالب بالفصل الواحد من جميع المستويات وهم طلاب بكالوريوس ودراسات عليا

تصنيفات

مصنفه من ضمن ١٠٠ افضل جامعة بالعالم عام  2003, 2006, 2007
من ضمن ٢٥٠ افضل جامعة بالعالم لعام ٢٠١٧
اول وافضل الجامعات بالبرنامج وتخصص الكتابه في أمريكا.
بالمرتبه ٧ بأفضل الجامعات لتخصصات الطبيه للكبار والمرتبه ٨ لافضل التخصصات الطبيه للأطفال
تحتوي على ٢٤ برامج لدراسات العليا من افضل ٢٥ برنامج
واحد من ٢٠ جامعه في منظمة اليونسكو للادب والوحيده من جامعات أمريكا
بالمرتبه ٣٣ بقائمة افضل الجامعات الوطنيه العامه بأمريكا ب عام 2017
وماخلصنا باقي كثير من التصنيفات و الانجازات تعبت وانا واترجم واكتبها فتقدروا تتطلعوا عليهم من هذا الرابط https://uiowa.edu/homepage/rankings-and-facts
خلونا ناخذكم بجولة في جامعتنا.
ابرز 5 مباني, وكانت مباني حكوميه قبل اهدائها للجامعه. ويوجد باحدى هذه المباني متحف للهنود الحمر ومعرض للاحياء. المبنى ذو القبه وهو مركز للمحاضرات العلميه والحفلات. معلومه اضافية عن هذا المبنى, كان مركز الحكومه لما كانت مدينة ايوا سيتي عاصمة ولاية ايوا. والقبه مطليه بالذهب ويتم اعادة طلائها كل 30 سنه.

Campus

واهم قسم بالجامعه, مكتبة الجامعه الرئيسيه: المكتبه تفتح 24 ساعه وتوفر كل الاحتياجات لطالب من اجهزه وطابعات وكافتيريا وستديو تصوير ويوجد اماكن لدراسة لمجموعات واماكن هادئه جدا لدراسه. والمفاجأه هي ان بالدور 3 او 5 يوجد متحف للكتب القديمه. وشفت عندهم قران من العهد العباسي. لكن للاسف ممنوع التصوير ومالقيت صور بالانترنت للمجموعه. وفي كذا متحف داخل المكتبه لكني زرت اثنين منهم فقط

النوادي الرياضيه بالجامعه وهي مجانيه تماما لطلاب والموظفين

أيوا بفصول مختلفه

مثل ماانتوا شايفين جامعتنا كبيره جدا, وتوفر الكثير من الخدمات والمرافق لطلاب والموظفين. واحد من هذي الخدمات هي النوادي والافنت.
يوجد بالجامعه اكثر من ٥٠٠ نادي بمختلف الاهتمامات والمجالات.

Events

يوجد أنواع كثيره بعضها سنوي وبعضها شهري وبعضها اسبوعي وبعضها لمره وحده فقط
من اكثر أنواع الافنت اللي احب احضرها هي مناقشة الكاتب لكتابه, جدا ممتعه وملهمه. طبعا الكتب تكون بمختلف المجالات واغلبها روايات وكتب عن قصة حياة الكاتب. وراح اكتب لكم عن نقاش حضرته جدا جميل في بوست قادم ان شاء الله.
النوع الاخر وهو الحفلات والمهرجانات, واحد من اهم المهرجانات واكبرها وهو

“HOME COMIING”

ويكون يوم بالخريف كل سنه, وهو مهرجان عائلي ومجاني واغلبه من تجهيز الجامعه.
يبدأ المهرجان من ٤ عصر الى ١١ او ١٢ ونص مساء ” ماقد جلست لنهايته فموم تأكده”
مكان المهرجان, بشوارع مركز المدينه وهو وسط الجامعه.
من ٤ العصر الى ٨ مساء تكون مثل العرض او المسيره لنوادي والجمعيات والمنظمات بالمدينه والجامعه وتكون فيه عروض جدا ممتعه, بأزياء غريبه وسيارات ورقصات, وتنتهي المسيره بعرض للفرقه الموسيقيه ومشجعات فريق الجامعه.
ومن الساعه ٩ الى اخر الليل يبدأ الحفل الموسيقي ويكون مجاني للكل. وكل سنه يجيبون فرقتين مختلفتين وكل فرقه تكون لمدة ساعه ونص الى ساعتين.

الأمان:

المدينه تعتبر مدينه جامعيه وصغيره. الجامعه من ناحية الأمان جدا أمنه الشرطه بكل زاويه مو بس حول الجامعه حتى حول المدينه.
واذا كنت من الأشخاص اللي يخافوا يتنقلوا اخر الليل, في شرطة الجامعه تنقلك أي مكان تبغاه مجانا.
وفي تطبيق Guardian لطلاب ويرسل عن السرقات والاعتدائات بالجامعه لكن من النادر انك تشوف تنبيه منه
حتى مع القوانين الجديده لترامب مافي أي اعتدائات على الطلاب المسلمين.

التعامل:

السكان واغلب الطلاب والعاملين لطيفين ومتعودين لتعامل مع الأجانب وجدا متعاونين
يوجد نسبه كبيره من الصينين. وعدد لا بأس به من المسلمين من جنسيات متعدده مثل ماليزياء وإندونيسيا والسودانين. مع وجود هالعدد من العرب نسبة لقائك فيهم وقت الدوام مستحيله بسبب حجم الجامعه.
اذا كنت من الأشخاص اللي يستهينون بالاجانب انهم مايفهموا عربي وتاخذ راحتك بالحش ماانصحك هنا. لإن نسبه كبيره من الأجانب دارسه لغة عربيه بالجامعه.

المواصلات:

المدينه توفر ٣ أنواع باصات, باصات الكامبس, باصات ايوا سيتي, وباصات كورافيل.
الباصات موجوده ٦ أيام بالاسبوع ماتشتغل يوم الاحد. وتشتغل من ٦ الصباح على ١٠ بالليل. ماعدا باصات الكامبس
ومثل ماقلت مدينتنا جدا صغيره ابعد مشوار راح يكون ١٥د لمول كورافيل وهي المدينه الأخرى فمااعتقد انك راح تحتاج سياره اذا كنت لوحدك. الباصات توصل لكل مكان. ويعتمد على مكان سكنك لكن حتى لو كنت ساكن ابعد شي راح يكون في باص كل نص ساعه.

السكن

السكن هنا بشكل عام مو غالي سعره مقدور عليه وطبعا السعر على حسب موقع السكن هل هو قريب من الجامعة أو لا. وكل مانبعد عن الجامعة تصير الأسعار مقبولة أكثر وحجم المكان أكبر. المدينة رخيصة بشكل عام فمكافأة الملحقيو تكفينا وتزيد. فمن هالناحية لاتحاتون أبدا. وأيضا المدينة تناسب للعوائل أيضا

الترفيه

مدينتنا صغيره مافيها أي نوع من الترفيه غير الافنت اللي تسويها الجامعه. الجامعه يوجد فيها متاحف ومعارض كثيره وتكون مفتوحه اغلب السنه وبعضها سنويه.  وعندنا مول واحد فقط .وفي اوتلت يبعد نص ساعه عن ايوا سيتي. اقرب مدينه ترفيهيه او سياحيه راح تكون شيكاغو وتبعد ٤ ساعات.

الدراسه:

الجامعه دراسيه بحت والدراسه فيها مو سهله لكن مايعني ذلك انها مستحيله, كثير مبتعثين متخرجين منها بمراتب الشرف ومعدل عالي.
الجامعه توفر كل سبل الدراسه والمساعد لطالب
توفر أجهزة كمبيوتر ومكان لدراسه بكل مبنى. في ٨ مكتبات على حسب علمي واتوقع اكثر. وفي مراكز مساعدة لاي ماده تحتاجها, سواء كنت تبغى تدرس مع قروب او مع شخص يشرح لك.
توفر لك الدخول لاي بحث تبغاه ولمكتبات الجامعات الكبير بامريكا اون لاين.

دراسة اللغه:

معهد الجامعه ٥ مستويات, المعهد يمشي على نظام سمستر كامل.
الدراسه ٢٠ ساعه بالاسبوع وتدرس ٤ مواد . للإنتقال من مستوى الى اخر تحتاج الى C+ على الأقل بكل المواد, اذا نجحت ب ٣ مواد لكن رسبت بوحده بالذات بالمستوين الأخيرين انا اسفه اقولك انك راح تعيد المستوى كامل.
اختبار الفاينل وشغلك طول السمستر يعامل معامله منفصله. اذا جبت B بشغلك طول السمستر لكن جبت اقل من ٧٥٪ باختبار الفاينل ماراح تعدي.
 اعرف الموضوع معقد لذلك ماانصح أي شخص يجي يدرس لغه بمعهد الجامعه. المعهد جدا صعب, ماانكر انه يحسن من لغتك لكن الانتقال من مستوى الى اخر صعب جدا ويحتاج كفاح طول السمستر. شغلهم جدا كثير ودوامهم طويل. والمعهد يحب الفلوس, عادي مايخليك تعدي عشان فلوسك.
ولكني انصح جدا بالدروس بالجامعه, راح تعطيك تجربه الدراسه الجامعيه.
طلاب الماجستير
أنصح أي أحد قبل مايجي هنا لدراسة الماستر أنه يطلع على شروط المطلوبة لتخصصهم وأهم شي تشوف كم الدرجة المطلوبة باختبار الايلتس والتوفل أنصحكم أنكم تبدأون تختبرون ايلتس من قبل ماتجون عشان تجيبون الدرجة المطلوبة أسرع. بالعادة الدرجة المطلوبة 6.5 وبالغالب يبون 7. السبب لأن ماعندكم وقت تركزون على مذاكرة اختبار الايلتس وبين المعهد لأن شغله واجد *نقطة مهمة جدا جدا معهدنا ما بيأهلكم لإختبار الايلتس أبدا ماينفع فا لاتعتمدون عليه* وشي مهم بعد أقرب مركز لاختبار الايلتس يبعد عننا ساعتين ونص تقريبا فهالشي بيكون صعب للي ماعندهم سيارة وأيضا بيزيد عليكم بالتكاليف. أختبار التوفل عندنا مركز بالجامعة فبيكون قريب لكم. ومن الاسباب الي يخليكم تختبرون بدري هو الملحقية. لأن عندكم سنة وبالكثير سنة  ونص مع التمديد عشان تجيبون قبول الماستر. طبعا لازم تجيبون الدرجات المطلوبة في الاختبارات عشان يقبلونكم غير كذا مافيه ومايقبلون بدرجات أقل نهائي. أغلبية الطلاب الي جاو أضطروا ينقلوا لجامعات أخرى بسبب أنهم ماجابوا الدرجة وما كان عندهم وقت يختبروا كثير عشان يستوفون الشروط. طبعا هذي المرحلة هي أصعب شي بالنسبة لطلاب الماستر فعشان كذا أنصحكم وبشدة تشتغلون على القبول من قبل ماتجون أمريكا.

الرياضه:

كثير من الطلاب بالجامعه رياضين, والجامعه تدعم هذا الشي بتوفر نوادي او صالات رياضيه بالمباني.
وايضا الطلاب عندهم فخر واعتزاز كبير بفريق الجامعه, لذلك راح تشوف زحمة غير طبيعيه بموسم المبارايات والكل راح يتكلم عن المباراه.
انا جدا سعيده اني اكون جزء من هذا المجتمع والجامعه.صحيح انها تحب الفلوس واجد لكنها جامعه توفر كثير من الفرص والخدمات لطلاب.

GO Hawks 

ملاحظه” اغلب الصور والمعلومات من موقع الجامعه uiowa.edu و حسابهم بالتويتر @uiowa, اضيفوا حسابهم متعه بصريه, والنصف الاخر من الصور من تصويري وتصوير اختي جنان” 

Leave a Reply

Your email address will not be published. Required fields are marked *