السلام عليكم ورحمة الله وبركاته .. بداية فصل دراسي جديد وسعيد عليكم وإنجازات محققة إن شاءالله

لما غيرت نطام حياتي للصحي ، صرت أحاول قد ماأقدر أني أشتري منتجات طبيعية قدرالإمكان و أحاول أختار منتجات خالية من المواد الكيميائية والحافظة ، لكن أحياناً هالشي صعب ، فـ أذا مالقيت منتج طبيعي 100% أحاول أبحث عن منتج تكون أغلب مكوناته طبيعية وأعرف أنها راح تفيديني أكثر من أنها تضرني

اليوم راح أستعرض لكم بعض من منتجاتي المحببة لقلبي وصار لي أستخدمهم مدة طويلة ومرة مرتاحة منهم. طبعاً كل منتج أشتريه كنت أختاره بعناية بحيث أني أقرأ مكوناته وأشوف التقييم على المنتج وأقرأ تعليقات الآخرين عنه وأشوف مدى أستفادتهم منه. فللأستفادة ، عند صورة كل منتج بحط لكم من وين شريته بالضبط *أضغطوا على الصورة وبيفتح لكم رابط الموقع* عشان يسهل لكم ترجعون لكل منتج وتقرأون عنه أكثر وتشوفون تقييمات المستخدمين له

 

زبدة الشيا: من الأشياء اللي طحت بغرامها لما أكتشفتها ، أغنتني عن منتاجات كثيرة و حبيتها جدا جدا فادتني كثير ، وأغنتني عن كريمات الترطيب كلها .. أستخدمها كمرطب شفايف ، مرطب عميق لبشرتي خصوصا أن بشرتي جافة والكريم  90% من تركيبته هو موية فماينفع كثير لي و مايعطيني شعور الترطيب اللي أبغاه فـ أضطر أني أستخدم الكريم بشكل متكرر خلال اليوم عشان بشرتي ماتكون جافة.. لكن من بعد زبدة الشيا صرت أرطب جسمي كله مرة وحدة باليوم وغالباً يكون بعد ماأتروش على طول

 

هذي أول ماركة شريتها ، وحبيتها مرة من أول أستخدام. مميزاتها: عضوية وغير مكررة ، المكون الوحيد هو زبدة الشيا وسعرها معقول بالنسبة لمميزاتها. شريتها تقريباً بـ 14 دولار يعني مايعادل 53 ريال سعودي. أستعملتها تقريباً لمدة سنتين وكنت مرتاحة منها كثير لكن آخر علبتين طلبتهم كان ملمسهم رملي وغير عن اللي قبلهم فغيرت لهذي الشركة

 

المميزات تقريباً نفسها والجودة جداً ممتازة ، صار لي تقريباً سنة أستخدمها وعاجبتني كثير. حبيتها لأنها كانت أنعم من الزبدة اللي كنت أستخدمها قبل وسعرها جداً ممتاز. سعرها الأصلي 30 دولار -113 ريال لكن الحين عليها خصم أكثر من نص السعر فبتطلع عليكم ب 14 دولار- 53 ريال فقط

 

طبعاُ بما أن الزبدة اللي طلبتها عضوية فتكون خالية من أي روائح عطرية فشريت معها زيوت عطرية طبيعة عشان تعطيها ريحة حلوة ومحببة وتعطيها ليونة بحيث تكون سهلة الدهن على الجسم لأن الزبدة تجي شوي جامدة وتحتاج شوي جهد عشان تذوب باليد

 

كيف أستخدم زبدة الشيا: أول ماأشتريها أفرغ العلبة كلها في طاسة ، زبدية ، وعاء بكل اللهجات .. المهم بعد ماأفرغها أضيف لها كل الزيوت اللي أبغاها مثل زيت جوز الهند ، زيوت عطرية وأخلطهم مع بعض بالملعقة لما يشكلون خليط متجانس ناعم ولين ، و كل ماأضفتوا زيوت أكثر كل ماصارت أكثر ليونة وأسهل بالدهن على الجسم

 

أنصحكم تدخلون على الروابط وتشوفون تقييم المشتريين للمنتجات ، بالنسبة لي أستفدت منهم كثير وتعلمت منهم كيف يستخدمونها وكيف أستفادوا منها ، من الأشياء اللي أستفدت منها واجد وماكنت متخيلة أبداً أن الزبدة تستخدم للشعر. إذا كان شعرك كيرلي ، ناشف ، ومشكلتك معاه أنه ينفش بسرعة .. جربي تستخدمين له زبدة الشيا وشوفي كيف راح يخلي شعرك ملفلف وجميل

كيف أستخدمه لشعري الكيرلي: بعد ماأغسل شعري *لازم الشعر يكون مبلل ورطب*نقطة مهمة عشان مايدهن شعرك .. آخذ شوي من الخلطة اللي سويتها وأدهنها بيدي وأبدأ أحط على أطراف شعري من داخل وأنتقل بعدين لفوق ، طبعاً أحاول أني ماأحط زبدة الشيا بشكل مباشر على مقدمة شعري ومن برا ، عشان مايبين مدهون ومسطوع لكن لما أحطه من داخل وخصوصا لما يكون شعري رطب يعطي نتيجة مرضية جداً ولاينفش أبداً. طبعاً ممكن يضبط معك من أول مرة أو ممكن تتحتاجين عدة تجارب عشان توصلين لنتيجة أنتي تحبينها ، لكن لا تيأسين أبداً

 

من أفضل شركات الفيتامينات بالنسبة لي. الفيتامينات مستخلصة من مكونات طبيعية تماماً وهي من أول الشركات الرائدة في تصنيع الفيتامينات من الصفر من مزرعة خاصة فيهم. الشي الحلو أنها فيتامينات نباتية. هالشي كنت أعاني منه كثير لأني في أمريكا. أغلبية الفيتامينات اللي يبيعونها بالصيدليات تكون جيلاتينية ومصدر الجيلاتين غير معروف فـ أبعد عنهم تماماً ومافيه إلا هالنوعية مو مثل السعودية عندنا أنواع أخرى غير الحبوب. ومن مميزاتهم الأخرى ، الحبوب تصلح للي عندهم حساسية من الجلوتين والصويا. ملاحظة: بما أن عندي نقص فيتامين د وبناءً على الفحوصات الدكتورة وصفت لي جرعة 2000 وحدة دولية. إذا ماسويتوا فحص تقدرون تاخذون 1000 وحدة دولية ألا وهي الجرعة اليومية للوقاية من النقص. تحصلون المنتج هنا

 

المشمش المجفف سناكي المفضل هذي الفترة ، آخذه معاي للدوام ، آكله العصرية إذا أشتهيت شي حالي. وأفضل شي مثل ماتشوفون بالصورة المكون الوحيد هو المشمش بدونسكر مضاف أو أي مادة حافظة ومجفف بالشمس عشان كذا لونه بيكون غامق ومايل للبني أكثر من أنه برتقالي لأنه خالي من المواد الحافظة

 

لمحبين بذور الشيا بتحبون هالمنتج كثير، ولايفوت لأن السعر رخييص جداً بالنسبة للكمية. أنا أشتريت 2 باوند تقريبا 1 كيلو غرام ب 12 دولار بس يعني 45 ريال فقط. لاتفوتونه أبداً خالي من أي إضافات ويصلح للي عندهم حساسية من بعض أنواع الأكل. الجودة ممتازة و هالكمية بتظل معاكم فترة طويلة

 

أخيراً منتجنا المفضل بذور الكتان من أفضل مصادر الأوميجا 3 ومضادات الأكسدة. المنتج هذا خالي من المواد الحافظة والمواد الكيميائية. تقدرون تضيفونه على أكلكم بسهولة بدون مايأثر على الطعم مثل الزبادي والكيك وبتحصلون على فوائده

وبكذا نكون خلصونا ، حبيت أفيد كل اللي يحب يشتري المنتجات الطبيعية ويحاول يبعد عن الكيماويات قدر الإمكان. إن شاء الله تكونون أستفدتوا. ملاحظة كل المنتجات اللي عرضتهم هنا محببة لقلبي وصار لي سنين أستخدمهم*مبين من كمية زبدة الشيا اللي مشتريتها ^-^*  وإن شاءالله تعجب كل شخص يشتريهم. وأي أحد جربهم من قبل ياريت يعطينا رأيه

 

 روابط المنتجات: زبدة الشيا1 ، زبدة الشيا2 ، الزيوت العطرية ، فيتامين د ، المشمش المجفف ، بذور الشيا ، بذور الكتان

Leave a Reply

Your email address will not be published. Required fields are marked *