بدابة أحب أشكر كل الي شارك معنا في القيف أواي الأسبوع الماضي ، ومن هذا المنبر نحب نعلن عن أسم الفائزة سمية أحمد 

 

هذه التدوينة ستكون مختلفة عن بقية تدوينات السنة الجديدة ، الكل بدأ يطوي سنة 2016 وبدأ بكتابة أهداف السنة الجديدة اللي يطمح ينجزها في سنة 2017
لكن خلونا نكون صريحين مع أنفسنا ، كثير مننا بداية كل سنة يكتب قائمة بالأهداف اللي يتمنى ينجزها لكن مجرد ما يخلص الشهر الأول من السنة ، تكون لستة الأهداف في طي النسيان و مانتذكرها إلا قريب نهاية السنة. ونبدأ ننجز أكبر قدر من الأهداف بالقائمة عشان مانحس أن السنة أنتهت وحنا ماأنجزنا شي من الي كنا  نطمح له

 

فيه نقطة مهمة لازم نستوعبها ، كتابة الأهداف هي الخطوة الأولى لتحقيق الهدف ، لكن عشان نستمر ونوصل للهدف ، لازم نرسم خطة بجميع الخطوات اللازمة لتحقيق الهدف المعين.لأن اذا أنتِ مارسمت خطة واضحة للإنجاز ، هذا معناته أنك مو مستعد/ة للنجاح وقاعد/ة تخطط للفشل

 

في هذا الوقت من السنة ، أحب أقعد مع نفسي و أفكر بالإنجازات اللي حققتها وأضافت لحياتي معنى وقيمة أما على الصعيد الشخصي أو العملي. من أهم إنجازاتي في سنة 2016 وأنا جدا فخورة بنفسي أني تخرجت بتخصص أحياء بداية السنة وبعدها بديت دراسة الصيدلة. من المهم جدا أني أخصص وقت معين أفخر فيه باللي أنجزنه وحققته عشان أعطي دافع لنفسي أستمر وأحقق المزيد السنة الجاية. لازم أعطي نفسي التقدير اللازم وأكافئها على الأنجازات اللي عملت على تحقيقها. النتيجة راح تكون رضا عن نفسي أكثر ، و تقدير أكثر باللي أنجزته

 

مع بداية السنة الجديدة أدعوكم تعملون لستة بكل الإنجازات الي حققتوها سنة 2016 حتى لو كان إنجاز صغير جدا ، لأنكم تستحقون تشوفون مقدار التعب ومقدار ماأنجزتوا. مو بس تطالعون في قائمة أهداف السنة وتشوفون شنو حققتوا منها. لا أكتبوا كل شي تعبتوا عليه وحققتوه في هالسنة. خصصوا هالوقت من السنة أنكم تحتفلون بإنجازاتكم و تعطوا نفسكم التقدير والثناء. هالشي بيساعدكم كثير توضحون أهداف ونوايا السنة الجديدة
والحين نحب نسمع منكم ، شاركونا إنجازاتكم في سنة 2016 

 

Leave a Reply

Your email address will not be published. Required fields are marked *