السلام عليكم ورحمة الله وبركاته
 كيف حالكم وكيفكم مع الاجازه الطويله؟ ان شاء الله انجزتوا فيها؟
الاجازه كانت فرصه كبيره انكم تستثمروا في نفسكم وتمارسوا هواياتكم
من فيكم في فتره انتقاليه من ثانويه لجامعه أو من دراسه لوظيفه ومشغول ب الانتقال والتغيير في هذي الفتره؟ طبعا الانتقال من شي صغير لكبير هو بحد ذاته انجاز كبير بالنسبه لك لكن اكييد لا يخلو من الصعوبات والتحديات ,هذي الصعوبات هي الي تصقل شخصياتنا وتنميها.
طبعا انا شخصيه غير منظمه لكن غير فوضويه أيضا, اقع بالمنتصف.
 كنت انجز مسؤولياتي ومهامي بوقتها ,كنت مستمتعه ومؤمنه اني انجز الأشياء اللي احتاج انجزها بوقتها
 لكن نظرتي للاشياء تتغيرت وان كل ماكبرت زادت المسؤوليات اكتشفت ان هذي الطريقه ماراح تكون نافعه للمدى البعيد خصوصا للمهام اللي أنجزها باخر لحظه.
هذي السنه بالذات امر بمرحله إنتقاليه كبيره ففكرت و خططت اني أغير من نفسي ونمط حياتي للأفضل, لنمط يناسب حياتي حاليا.
من الاشياء الي راح تساعدني في ترتيب وقتي وإنجاز مهامي هو كتابتها في مكان ما مثل مذكره الجوال أو على ورقه. بالنسبه لي كتابة المهام وخصوصا الضروريه تحسسني بمسؤولية إنجازها. لذلك ٩٩٪‏ أنجزها في الوقت المحدد عكس المهام الغير مكتوبه واكثر شي ممتع بكتابة المهام الشخبطه على المهمه المنجزه. هذا الشي يعطيني نشوه واحس اني أنجزت بيومي وإني شخص له هدف، حتى لو كان هذا الشي صغير لكن على القليل أنجزت وعملت شي بيومي.
هذي المره حبيت اني اكون منظمه اكثر وقررت استعمال منظم أسجل فيه المهام الي تحتاج الى إنجاز أو أبدأ العمل عليها قبل أيام من وقت تسليمها. طبعا أنا وحدة فاشلة في إستخدام الاوراق لأني أفضل أحفظ المهام ب عقلي.  لكن هذي الطريقه عديمة الجدوى لما تكون المهام الي تحتاج إنجاز كثيره. وكثير من الأحيان، مع كثرة الضغوطات و المهام أنسى كثير منهم.
مهمتي لنفسي هذي الفتره, أني التزم بكتابة المهام والمسؤوليات وراح أرجع لها بعد فترة لأرى مدى نجاحي وكميه الانجاز اللي حققته.
 
أتمنى أنكم تجربوا اقتناء منظم وتشوفوا كيف مستوى إنجازكم يزيد.
أتمنى لكم سنه دراسيه موفقه.
جنان 

Leave a Reply

Your email address will not be published. Required fields are marked *