مساء الخير,

اكتب هذه التدوينة بليلة ماطره وانذار بفيضان وصوت سيارات المطافي يصدح بسكون الليل , ماعلينا احس البيت بينقشع* من مكانه. بمعنى بيطير وبينشال من مكانه*
الصوره توضح لكم قد ايش كان الجو جميل قبل العاصفه. *الصوره بدون اي تعديل*
 
تدوينة غير مخطط لها ولا اعلم من اين ابدأ بها, حتكون مليئة بالحلطمه ,والكلام الغير مرتب والكثير من الخطط والاشياء الغير مفيده لذلك لنتحدث بالعاميه.
 
متابعيني بالتويتر يعرفوا اني اخذ ترم صيفي من حلطمتي الا متناهيه, جديا هذا اكثر سمستر ادرسه وانا كارهته من بعد تخرجي من الثانوي. لأن الترم الصيفي هذي السنه جدا طويل ١٠ اسابيع والاجازه اللي بعد ترم الربيع والترم الصيفي كانت ١٠ ايام فقط ماامداني ارفه عن نفسي. وغير كذا رمضان هنا معذبني وانا اشوف كل الناس مع اهلهم وانا اتعذب هنا لوحدي مع طول النهار. نصوم من ٤ الفجر الى ٩ المساء, مع طول فترة الصيام اللي تعذب دوامي يبدأ ٨ وينتهي ٤ ومحاولة اخذ غفوه كذلك لا تنفع لاني ازهق من النوم واصحى ووقت الافطار لسه ماصار وتقضيت الليل القصير اللي من اخلص فطور تكون ١١ بحل الهومورك والمذاكره. الحمدالله على كل حال مابقى من رمضان شي, اذا ربي احياني السنه الجايه راح اقضي رمضان بين اهلي ان شاء الله.
اختبرت اخر ميدتيرم اليوم وعندي يوم اجازه بكرا, هي اجازه لمدة يوم لكنها تعني لي الكثير بعد الكرف. خلصنا ٥ اسابيع وتبقى ٥ اسابيع ان شاء الله تمر بسرعه وبخيرها وشرها وتبشرنا باحسن الدرجات.
 
كفايه حلطمه عن الدراسه, بعد مااخلص الترم الصيفي راح تكون عندي اجازه من اسبوعين الى ٣ اسابيع تعتمد على درجاتي. فان شاء الله خير فقط ادعولي بA’s يارب ياكريم.
 
ماعلينا في هذي الاجازه عندنا بعض المخططات اللي ممكن تتحقق وممكن لا, ماعلينا اهم شي تكون فيه مخططات. وبعض المهام الضروريه.
 
  1. [مخطط] من زمان نفسي اتعلم على برامج الترجمه, في اجازتي اللي مدتها يوم بحثت عن بعض البرامج لترجمه وطريقة استخدامهم وجربت طريقة الترجمه وكانت اسهل من ماتوقعت, راح اوقف لهذا الحد في استخدامها واكمل الباقي بعد نهاية السمستر. واليوم شفت مشروع #أترجم تقدروا تشوفوه من هنا فكرته اننا نترجم فديوهات علمية اجنبيه لسهل الوصول للمعلوم بمحتوى عربي مثمر. ان شاء الله راح اشترك فيها لكن مو القناه Crash Course Philosophy لاني تشبعت منها بدراستي وكرهتها. اشتركوا بالمشروع تجربة حلوة ترا.
  2. [مهمه] اسبوع الفاينل لازم انقل لسكن جديد , من الان شايله هم متى ابدأ اشيل الاغراض والحوسه, عشان وقتها اركز بالاختبارات. هذي اول مرا لي بالنقل وان شاء الله مافي بعدها , لكني مو متخيله كيف ممكن انقل الاثاث وكل قطعه صغيره بالبيت لكن ربي يسهل.
  3. [مخطط] بعد تفكير وتمعن قررت اصبغ شعري , لكن للان ماصارحت امي او اخترت الصبغه, او حتى ممكن اغير رايي على اخر لحظه , لوقت الاجازه نشوف وش يصير.
  4. [مهمه] ارجع لتمرين والاهتمام باكلي بشكل اكبر, راعيت نفسيتي حاليا كثير بسبب الضغط الدراسي فان شاء الله راح نرجع اشخاص اصحاء من جديد. وعشان كذا سجلت بكورسين بالاجازه الاول Health & Fitness Program والاخرى Sports Nutrition تقدروا تشوفوهم وتسجلوا هنا فيه دورات اخرى لاي مجال انتوا مهتمين فيه. وشرح التسجيل بالدورات هنا.
تقريبا هذي كل الاشياء اللي ببالي حاليا, يوجد الكثير من الخطط لكنها تختفي بزحمة بمخي اذا ماسجلتها, راح احاول اسجلهم اول باول مرا اخرى بالمنظم. المنظم شي رائع ماتوقعت اني راح استمر فيه طول هذي المده لكني اقدم اداء جيد فيه . أمنت بفكرة ان المهام المسجله منجزه, اقتنوا لكم واحد.
 
تدوينة فيها الكثير من الكلام الغير مفيد انا شاكره واسفه لكم اذا وصلتوا لهذا السطر, لكني فقط اشتقت لتدوين وقررت اني اطلق العنان لاصابعي واشوف وين بتوصلنا. 
 
نراكم بتدوينة اخرى بعد الفاينل , دعواتكم. 
 

Leave a Reply

Your email address will not be published. Required fields are marked *