السلام عليكم ورحمه الله وبركاته
كيف حالكم ؟ وكيف نهاية الأسبوع؟
بما أني أدرس في الخارج وبآخر سنوات الدراسة ، أوقات كثيره أحس أني مشغولة كثير بالدراسه وماعندي وقت أسوي شي آخر أو بالأحرى “مالي خلق” خصوصا بعد ماأرجع من الدوام.
طبعا الأكل بالنسبة لي أزمة .. أرجع من الدوام تعبانة وجوعانةة حدي بس أبي أجي وآكل على طول, لكن للأسف مافيه شي جاهز ..ومافيني أني أطبخ .. وبعد ماأحب آكل من بره. فمشكلتي عويصه
لكن فيه أكله سريعه وتشبع وأسويها بوقت الزنقات والأهم من كذا أنها صحيه وتغذي جسمي وعقلي.
 كل الي نحتاجه للوصفة بطاطس عادي حق الطبخ 
نغسل البطاطس ونقطعه بأي شكل وبعدين تضيفون عليه أي نوع بهارات
البهارات الأساسيه الي راح تعطي نكهة لذيذه للبطاطس:
ثوم بودرة
كركم
رشة كمون
ملح
شوية فلفل
زيت زيتون
البهارات الأخرى ممكن تكون:
بابريكا 
زعتر
زعتر بري ..أوريغانو
كزبره مطحونة
أختاروا أي مكس من البهارات الي تحبونه
تخلطون البهارات بالبطاطس زين لما يتغطى كامل 
بعدين تحطونه بصينيه وتدخلونه الفرن بحراره ٣٥٠ لمدة ٢٠ دقيقة ممكن تكون أكثر أو أقل على حسب حجم البطاطس
لما تصفونه بالصينية تأكدوا أن البطاطس مايكون فوق بعض عشان ينضج عدل. طبعا البطاطس بالبهارات أفضل أسويه بالفرن أفضل من القلاية الكهربائية لأن الطعم يصير أحلى
وهذي النتيجة النهائية
ممكن تآكلونه لحاله أو مع خضار أو طبق جانبي مع الوجبه. تقدرون تستخدمون البطاطا الحلوة بدل البطاطس العادية طغمها جدا لذيذ بهالطريقة
أحب هالوصفة لأنها سهلة وتنفع بأي وقت. الأطفال يحبونه بعد وأفضل لهم من البطاطس المجمدة الجاهزة أو المقلية
وبس .. ان شاءالله بالأيام الجاية أحاول أنزل وصفات سهلة وتشبع خصوصا اذا كان الشخص ماعنده وقت

Leave a Reply

Your email address will not be published. Required fields are marked *