صباح /مساء الخير 
كل عام وانتوا بخير , وينعاد رمضان علينا وعليكم بالصحه والعافيه 
تدوينة اليوم بلا هدف او موضوع معين 
 
 
 
حاليا امضيت شهرين بمكان اقامتي الجديد 
شهرين ممتعه جدا , كثير من التجارب الممتعه , والامور الجديده 
احساس الحريه جدا جميل , انا اقضي بعض اموري لوحدي , احس بالاستقلاليه 
 اطفش واطلع امشي بالشارع بدون محد يتعرض لي بكلمه او نظره هذا نوع من الحريه !
تقريبا هذا اكثر شعور يحسسني بالحريه واستمتع فيه 
اني اخلص من دوامي واروح اتمشى حول مباني الجامعه او اقضي بعض احتياجاتي لوحدي 
اروح المكتبه واحل واجباتي ومتى ماخلصتها رجعت بدون محد يحدد لي وقت ارجع فيه 
اني اتعامل مع ناس مختلفه  ,واستمتع بمحادثه عفويه معهم 
اتعرف على جنسيات مختلفه من اديان مختلفه , نتعرف على حياة بعض .
على مدن جديده ببلدان كبيره مانعرف غير اسمها .
اني اتعامل مع شباب بلدي ! جديا هم اكثر ناس حنا ظالمينهم , شبابنا جدا محترمين وفيهم خير * قبل كنت احسبهم ذئاب بشريه واخاف اقرب منهم *
 
 
اروح رحله للبحر , وهذي من امتع الاشياء اللي سويتها للان ،لإن الرحله الوحيده اللي رحتها بالروضه لمركز العلوم 🙂 
شعور اني اكون بوسط البحر مع حدا صديقاتي فقط , احساس اني حره , هذي لحظه مااتوقع راح تتكرر
اني اركب قارب , واتعلم التجديف  
اني اركب الباص واضيع فيه * لكن اللي يهونها علي انه راح يرجعني مكان مااخذني*
اروح لمكتبه عامه مثل اللي نشوفها بالافلام !رفوف لا متناهيه من الكتب , مناطق للقراءة ولدراسه , هدوء لدرجة قلب صفحة الكتاب تكون مزعجه , او ماتسمعين فيها غير طقطقة ازرار الاجهزه لطلاب
عموما اصبحت مكاني المفضل * اكتب البوست منها الان *
 
 
اوه ونسيت شيئا ما اني التقي بصديقه قديمه ماكنت اشوفها بالسعوديه التقي فيها هنا من اكثر الاشياء اللي اسعدتني 
من الاشياء اللي مبسوطة فيها , امتلاكي لكريدت كارد *كفتاة ماكنت تملك غير مصروفها المدرسي المقدر ب٥٠ ريال بالاسبوع هذا شي يفوق تخيلي * اكون بقمة سعادتي لما استعملها 
المظله وماادركم مالمظله الحين عرفت مدى اهميتها وبأيش يستعملونها 
المظله بالسعوديه ماكنا نعرفها الا بالاسم فقط لحظة سعيده لما استعمل المظله , مع انوا يعتبر جو غير جيد لكني استمتع باستعمال المظله 
 
 
من الاشياء اللي كنت فاقدتها : روتين الصباح لدوام لما ادخل لكلاسنا بالثانوي وكلنا فينا النوم ونصبح على بعض , عرفت انوا الدوام نعمه وهالروتين من الاشياء الجميله , لذلك حاليا دايم ابتسم لما ادخل الكلاس الصباح واشوفهم بهالحاله 
المحادثات القصيره بيننا وبين بعضنا بالكلاس , النشاطات والالعاب اللي نسويها والضحكات بوسط الكلاس , من متع الدوام بالنسبه لي جدا استمتع فيها 
 
كفتاة متخرجة من الثانوي , بسن 18 فقط واحضى ببعض هذي الاشياء , هذا جدا ممتع شعور مااقدر اوصفه 
جديا الحريه اللي نطالبها ببلدنا مو شي كبير 
اشياء بسيطه فقط تحسسنا بالاستقلاليه 
نحتاج نحس اننا نملك ذاتنا ولسنا اشخاص مملوكين 
 
 
التدوينة كتبتها بكل عفويه وبدون اي تخطيط 
 
*ممكن تحسوا اني انسانه مكتومه بالبلد لكني كنت انسانه طبيعيه واروح واجي لكن لما تكوني بمفردك هذا شي اخر *
* وممكن تشوفوا الاشياء اللي استمتع فيها طفوليه , لكني مقتنعه انوا اي لحظه تكون مستمتع فيها كطفل , تكون مستمتع فيها بشكل مطلق و والاستمتاع بالاشياء البسيطه قمة السعاده *

2 thoughts on “I’m trying something new and fun :)”

  1. العفوية والقناعة تخليك تحس بالسعادة من ابسط الامور ? حبيت وصفك للمواقف اللي صارت وكأني اشوفها تصير قدامي ??
    اقترح عليك تنزلين دايلي بوستس بتفاصيل اكثر ? وصفك جدا جذاب وممتع للقراءة ?

Leave a Reply

Your email address will not be published. Required fields are marked *