اول بوست راح اتكلم فيه عن شي غير حياتي للاحسن من كل النواحي
 شي اكتشفته بالصدفه لما كنت متضايقه من نفسي وشكلي 
نظام الحياه الصحي
لما حد يقولكم هالجمله وش يجي على بالكم ! 
هي معادله سهله بس تطبيقها صعب مو مستحيل ويبغالها صبر 
 
 
1- الاكل الصحي : موجود بكل بيت , مااعتقد فيه بيت مافيه اكل يوجد على هيئته الطبيعيه
طريقة طبخنا هي اللي تأثر فيه وتخليه اكل غير صحي 
اشياء بسيطه لو نستبدلها راح يكون اكلنا صحي 
بدل المقلي [ بالمشوي والمسلوق ]
بدل الخبز والتوست والساندويش الرز والمكرونه والطحين الابيض نستبدلهم [ بالبر او النخاله ]
 الشبس وقت الطفش نستبدله [ بالفواكه والمكسرات ]
المشروبات الغازيه نستبدلها [ بالسموذي ]
المايونيز نستبدله [ بالزبادي والخردل ]
الجبن السايل والقشطه وجبن كيري [ جبن حلوم , وجبن أريش , ولبنه , وكثير اجبان صحيه ]
الشوكلت العادي نستبدله [ بالدارك شوكلت اللي تكون نسبة الشوكلت فيه من 60% واكثر ]
الزيت العادي نستبدله [ بزيت زيتون لطبخ او افوكادو بالسلطه ]
الملح العادي نستبدله [ بالملح البحري ] افضل من العادي بس مو يعني ناخذ راحتنا
فخذ دجاج نستبدله [ بصدر دجاج بدون جلد ] تقدرون توفرون كمية دهون بهالاستبدال البسيط 
السكر نستبدله [ بالعسل ]
الحلويات نستبدلها [ بالتمر والزبيب والفواكه المجففه
الكورن فليكس نستبدله [ بالشوفان والموسلي والكورن فليكس الصحي ]
كثير اشياء تقدرون تستبدلونها تغير حياتكم للافضل , لازم تعرفون وش تختارون ووش يدخل لاجسامكم لانها امانه عندكم
القاعده جدا سهله وبدون حرمان تاكلون كل اللي تبغونه بس بذكاء .
 
 
2- المويه﴿وَجَعَلْنَا مِنَ الْمَاءِ كُلَّ شَيْءٍ حَيٍّ﴾ 
معروفه اهمية المويه وكيف جسمنا يحتاجها , كثثير مايشربون مويه , يشربون كوب او كوبين باليوم ! كل اللي يشربه مايجي نص لتر وجسمنا يحتاج من لترين ونص الى 3 ! 
 الدماغ , الكلى , القلب , الرئتين , الكبد , الامعاء , المعده , أعضاء الجسم , البشره , الشعر كلها تحتاج للمويه 
المويه تكون 70% – 80% من خلايا الدماغ 
نقص المويه بالدماغ يؤدي الى الصداع والاجهاد وعدم التركيز وأكثر 
هذا تؤثير نقص المويه على الدماغ ثاني اهم عضو بالجسم , كيف تتوقعون تأثيره على باقي اعضاء الجسم ! 
المويه جدا مهمه , حاولوا تشربون 4 لتر باليوم لمدة شهر وبتشوفون التأثير على نفسكم 
اللي ينسى يشرب مويه , يقدر يشتري له مطاره او علب مويه ويحطها بكل مكان , وياخذه معه كل مكان راح يشرب حتى لو مو عطشان لانها قدامه 
راح يشرب 4-3 لتر بدون مايحس
اللي مايحب يشرب مويه , يقدر ينكهها يحط معها فواكه ويخليها طول الليل بالثلاجه عشان تبان نكهتها وتكون بارده ومنعشه .

 
3- النوم﴿وَجَعَلْنَا اللَّيْلَ لِبَاسًا * وَجَعَلْنَا النَّهَارَ مَعَاشًا
النوم الصحي واللي يستفيد منه جسمك هو النوم  6-8 ساعات بالليل 
حتى لو نمتوا 8 ساعات بالنهار ماراح تكون بنفس فايده نوم الليل 
وتقدرون تاخذون غفوه بعد الظهر وقبل الغداء تكون نص ساعه وبالكثير ساعه 
نوم الليل جدا مفيد , وتصحون اليوم اللي بعده نشيطين 
عكس لما تنامون النهار وتصحون الليل , ماتنجزون كثير وطول الوقت مكسلين ومالكم خلق 
والسهر جدا مضر , يجهد الجسم , ويقلل التركيز , ويخليك تشتهين اكل غير صحي 
موسوعة جينس اللي فيها انواع الغرائب مافيه اطول مدة سهر , لانه هذا الشي خطير ومضر 
ومثل مالسهر مضر حتى النوم الكثير مضر , يسبب الخمول ويخليك تحس انك تبغى تنام اكثر 
وغير اوجاع الظهر والجسم .
 
 
4- الرياضه : ماادراكم مالرياضه , الكل يعرف تأثير الرياضه على الجسم بس يتجاهل اهميتها
الرياضه جدا مهمه مهمه لصحة القلب , تزيل الدهون المتراكمه حول القلب , وتحسن التنفس وتزين جسمك 
وتحسن من نفسيتك , وتخليك نشيطه طول اليوم وتنجزين اكثر 
مو شرط تمارسون تمارين قوية وطويله كل يوم , 10 -15 دقيقه كل يوم , من تمارين كارديو , او مشي 
ومو شرط كل يوم 3 مرات بالاسبوع كويس بعد 
قليل مستمر خير من كثير منقطع 
واليوتيوب بحر , تمارين اشكال وانواع لكل عضله بجسمك , مهما يبلغ صغرها 
وبرنامج الرياضه الحين كثيره وتقدرون تحملونها من التورنت , مو شرط تروحون نادي 
وممارسة التمرين الرياضيه لمدسة ساعه باليوم تكون 4% بس من وقتك 
 
 
هذا اسلوب الحياه الصحي , مو شرط تسوون كل هالاشياء مره وحده كل شي يبدأ بالتدريج , ومع التدريج راح تغيرون عاداتكم 
 طبعا هذا النظام له اثر 
  • اثره على وقتي : لما تلتزمون بكل هذا وتمارسين تمارينكم وتاكلين وجباتك بوقت محدد ومرتب , وتنامين وتصحين بوقت محدد , تنجزين اشياء كثيره بيومك , لان يومك يكون مرتب يمديك تنجزين فيه كل شي , وغير كذا يبقى لك وقت فراغ
  • اثره على نفسيتي : اكييد نفسيتي راح تكون للاحسن , الاكل الصحي يخليك خفيفه طول الوقت , والرياضه تفرز هرمون الاندروفين اللي يزيد السعاده والراحه , والنوم المرتب اللي تكونين فيه شبعانه نوم يخليك نشيطه وتنجزين اكثر وهذا يخليك فخوره بنفسك 
  • اثره على جسمي : الحمدالله بهذا النظام جسمك يصير من الافضل لافضل  , كل الاشياء اللي تكلمنا عليها تأثيرها داخلي قبل مايكون خارجي , بس نتايجه ماتطول على بال ماتبان من برا , بشرتك تفتح وتكون نظره , والحبوب تختفي وشعرك يكون قوي , وجسمك يصير مثل اجسام المودلز والثقه بالنفس تزيد 
  • اثره على اللي حولي : اذا بدأتي بنفسك وبدت تبان عليك النتايج , غيرك راح يقتدي فيك ويسوي مثلك واولهم اهلك 
  • اثره على دراستي : لما يكون وقتك مرتب وشبعان نوم , راح تذاكر كويس , وتروح الدوام نشيط , والمويه تساعدك بالتركيز وبعض الاكل الصحي كذلك , بإذن الله راح تكون درجاتك عاليه 

وبكذا اكون خلصت , وان شاء الله افدتكم بشي بسيط , واعطيتكم دافع للبدأ بتغير حياتكم , ونقطه للبدأ منها 

twitter  . Ask
 

Leave a Reply

Your email address will not be published. Required fields are marked *